រមណីយដ្ឋាន “សួនរុក្ខជាតិអង្គរ” ផ្តល់ឱ្យទេសចរនូវអារម្មណ៍ថ្មីប្លែកជាមួយទេសភាពបៃតង ការទស្សនាសត្វ និងរុក្ខជាតិកម្រៗ

សួនរុក្ខជាតិអង្គរ គឺជារមណីយដ្ឋានរុក្ខជាតិ ដែលមានទំហំផ្ទៃដីប្រមាណ១៥ហិកតា ត្រូវបានបែងចែកជា ៥ផ្នែកខុសៗគ្នា រួមមាន៖ សួនឱសថ សួនផ្កា សួនអម្បូរត្នោត សួនលំនៅឋានខែ្មរ និងសួនសត្វព្រៃជាដើម។

មកដល់ពេលនេះ អាជ្ញាធរជាតិអប្សរា បានយកចិត្តទុកដាក់ក្នុងការថែទាំ និងរៀបចំ រហូតមានការវិវត្តរីកចម្រើនថ្មីៗ ដូចជា៖ សួនផ្កាកុលាប និងសួនកេសរកូល ក៏បានបង្កើតបន្ថែម រហូតមានភាពទាក់ទាញទេសចរជាតិ និងអន្តរជាតិ បានចូលមកទស្សនាជាហូរហែ។

សួនរុក្ខជាតិអង្គរ គឺជាមជ្ឈមណ្ឌលមួយ ដែលប្រមូលផ្តុំទៅដោយរុក្ខជាតិកម្រៗ ជិតផុតពូជជាច្រើនប្រភេទ ដោយរុក្ខជាតិខ្លះ ភ្ញៀវទេសចរនៅមិនទាន់បានស្គាល់នៅឡើយ។ ហេតុដូច្នេះទេសចរ មិនត្រឹមតែទស្សនា ដើម្បីទទួលបានអារម្មណ៍ថ្មីប្លែកជាមួយទេសភាពបៃតង និងទស្សនាសត្វកម្រៗប៉ុណ្ណោះទេ ប៉ុន្តែសួនរុក្ខជាតិអង្គរ ជាទីតាំងសិក្សាស្រាវជ្រាវបន្ថែម សម្រាប់សិស្សានុសិស្សថែមទៀតផង។

សូមជម្រាបថា សួនរុក្ខជាតិអង្គរ មានទីតាំងស្ថិតក្នុងក្រុងសៀមរាប ជិតបុរីប្រិមប្រិយ ដោយបើកឱ្យទេសចរជាតិ និងអន្តរជាតិ ចូលទស្សនាដោយឥតគិតថ្លៃ ចាប់ពីម៉ោង ៨ព្រឹក រហូតដល់ម៉ោង៦ល្ងាច ចាប់ពីថ្ងៃពុធ រហូតដល់ថ្ងៃច័ន្ទ និងថ្ងៃបុណ្យជាតិ លើកលែងថ្ងៃអង្គារប៉ុណ្ណោះ។