ខ្មែរ
English
បើទោះបីនៅក្នុងរដូវក្តៅ វាមានពន្លឺថ្ងៃគ្រប់គ្រាន់ក៏ពិតមែន ប៉ុន្តែអ្វីដែលគួរឱ្យបារម្ភបំផុតគឺស្បែកមុខ ព្រោះក្នុងរដូវនេះស្បែកមុខងាយនឹងរងផលប៉ះពាល់ច្រើនដូចជា ឡើងខ្លាញ់ រលាកកម្តៅថ្ងៃ រមាស់ ស្បែកស្ងួត និងក្រិនខ្មៅ…។
ដូច្នេះ វាគឺជារឿងសំខាន់ក្នុងការរក្សាស្បែករបស់អ្នកឱ្យមានសភាពត្រជាក់ មានសំណើម និងធ្វើយ៉ាងណាឱ្យស្បែកមុខអ្នកមានភាពស្រស់ស្រាយ ។ អ្នកត្រូវយកចិត្តទុកដាក់បន្ថែមទៅលើ ការផ្តលជាតិទឹកដល់រូបរាងកាយ ការការពារពីផ្នែកក្រៅ (ប្រើប្រាស់ឡេការពារកម្តៅថ្ងៃ, នៅកន្លែងម្លប់ឱ្យបានច្រើន) និងទទួលទានអាហារបំប៉នឱ្យបានច្រើន។ មធ្យោបាយងាយស្រួល និងរីករាយក្នុងការធ្វើនោះគឺ ការប្រើម៉ាសបិទមុខត្រជាក់ដែលផលិតនៅផ្ទះ។
ឡេឌីស៍សូមបើបង្ហាញអំពីវិធីសាស្ត្រធម្មជាតិតាមរយៈការធ្វើម៉ាស់បិទមុខដែលអ្នកអាចរកគ្រឿងផ្សំទាំងនោះនៅផ្ទះបាន។ ខាងក្រោមនេះគឺជាប្រភពនៃរូបមន្តម៉ាស់បិទមុខដ៏មានប្រភាពចំពោះសុខភាពស្បែកមុខ នារដូវក្តៅ។
ម៉ាស់ត្រសក់ និងប្រទាលកន្ទុយក្រពើ ៖ យកត្រសក់កន្លះផ្លែ (កិនឱ្យម៉ត់) រួចលាយជាមួយជែលប្រទាលកន្ទុយក្រពើចំនួន ២ ស្លាបព្រាបាយ។ កូរចូលគ្នាឱ្យសព្វ រួចលាបល្បាយម៉ាស់នៅលើមុខរបស់អ្នក ទុកចោលរយៈពេល 10-15 នាទី សឹមលាងចេញជាមួយទឹកស្អាត។ វាមានអត្ថប្រយោជន៍ផ្តល់សំណើមដល់ស្បែកដែលរងការរលាកពីកម្តៅថ្ងៃ។
ម៉ាស់យ៉ាអ៊ួរ និងទឹកឃ្មុំ ៖ លាយយ៉ាអ៊ួរគ្មានរសជាតិ(ធម្មតា) ២ស្លាបព្រាបាយ ជាមួយនឹងទឹកឃ្មុំ ១ស្លាបព្រាបាយ។ លាបល្បាយម៉ាស់នេះលើមុខ រយៈពេល 10-15 នាទី រួចលាងទឹកចេញឱ្យបានស្អាត។ ម៉ាសប្រភេទនេះធ្វើឱ្យស្បែកមើលទៅមានជាតិទឹកគ្រប់គ្រាន់ និងមិនស្ងួត។
ម៉ាស់ប្រេងដូង និងប្រទាលកន្ទុយក្រពើ ៖ លាយប្រេងដូង ១ ស្លាបព្រាបាយ និងជែលប្រទាលកន្ទុយក្រពើចំនួន ២ស្លាបព្រាបាយ រួចកូរឱ្យសព្វសាច់គ្នា សឹមយកល្បាយនោះមកលាបលើស្បែមុខ។ ទុកចោលរយៈពេល ១០-១៥នាទី លាងទឹកចេញជាការស្រេច។ ក្រោយមកអ្នកនឹងឃើញថាម៉ាសនេះពិតជាផ្តល់សំណើមដល់ស្បែកមុខអ្នកប្រាកដមែន។
ម៉ាស់ម្សៅ Oatmeal និងយ៉ាអ៊ួរ ៖ លាយម្សៅ Oatmeal និងយ៉ាអ៊ួរចំនួន ២ ស្លាបព្រាបាយ រួចកូរឱ្យសព្វល្បាយម៉ាស់។ លាបល្បាយម៉ាសនៅលើផ្ទៃមុខ ទុកចោលពី 10-15 នាទី រួចលាងទឹកចេញជាការស្រេច។ ម្ស៉ៅ Oatmeal មិនត្រឹមតែធ្វើឱ្យមុនមានសំណើមទេ ថែមទាំងធ្វើឱ្យមុខសភ្លឺថ្លាទៀតផង។
