វិធីការពារជំងឺគ្រុនផ្តាសាយក្នុងអំឡុងពេលមានផ្ទៃពោះ..អ្នកម៉ាក់ៗគួរស្វែងយល់!

ជំងឺផ្តាសាយ អាចជាជំងឺទូទៅចំពោះមនុស្សគ្រប់រូប ប៉ុន្តែប្រសិនបើស្ត្រីមានផ្ទៃពោះទទួលរងជំងឺនេះ វាមិនមែនជារឿងធម្មតាទេ ស្ថានភាពនៃជំងឺអាចនឹងធ្ងន់ធ្ងរជាងអ្វីដែលអ្នកគិតទៅទៀត។ មិនថាជាជំងឺផ្តាសាយ ឬប្រភេទជំងឺផ្សេងៗទៀតទេ ស្រ្តីពរពោះងាយរងការឆ្លងខ្លាំងបំផុត ហើយក៏បង្កគ្រោះថ្នាក់ទាំងម្តាយ និងទារកក្នុងផ្ទៃ។ កាលណាមានជំងឺរាត្បាតក្នុងសារពាង្គកាយ នោះប្រព័ន្ធភាពស៊ាំរបស់ម្តាយនឹងធ្លាក់ចុះដែលជាហេតុបង្កហានិភ័យយ៉ាងខ្លាំងដល់ទារកក្នុងផ្ទៃ។

តើជំងឺគ្រុនផ្តាសាយគឺជាអ្វី?
ជំងឺគ្រុនផ្តាសាយ (Influenza) គឺជាការឆ្លងមេរោគផ្លូវដង្ហើម ជាទូទៅតែងកើតមានឡើងក្នុងរដូវរងារ (អាកាសធាតុចុះត្រជាក់) ឬរដូវធ្លាក់ខ្យល់។ វាបង្កឡើងដោយមេរោគម្យ៉ាង ដែលមេរោគនេះមានការបំប្លែងយ៉ាងឆាប់រហ័សពីមនុស្សម្នាក់ទៅមនុស្សម្នាក់ទៀត។ អាការនៃជំងឺនេះមានដូចជា ក្អក កណ្តាស់ និយាយស្អកៗ និងស្លេកបំពងក។ ដែលងាយស្រួលធ្វើដំណើរពីមនុស្សទៅមនុស្ស។

ចាក់ថ្នាំវ៉ាក់សាំងបង្ការជំងឺគ្រុនផ្តាសាយ
ដើម្បីចូលរួមកាត់បន្ថយហានិភ័យនៃការកើតជំងឺផ្តាសាយអំឡុងពេលមានផ្ទៃពោះ អ្នកម៉ាក់អាចធ្វើការចាក់ថ្នាំវ៉ាក់សាំងការពារជំងឺផ្តាសាយនៅតាមបណ្តាមណ្ឌលសុខភាព ឬសម្ភពនានា ប៉ុន្តែត្រូវប្រាកដថាថ្នាំនោះជាប្រភេទថ្នាំសម្រាប់ស្រ្តីពរពោះ។ ការចាក់ថ្នាំវ៉ាក់សាំងការពារជំងឺផ្តាសាយផ្តល់សុវត្ថិភាពដល់ម្តាយនិងទារកក្នុងផ្ទៃនូវគ្រប់ដំណាក់កាលនៃការពរពោះ និងជួយឱ្យប្រព័ន្ធភាពស៊ាំរបស់អ្នកផលិត Antibodies ដើម្បីប្រឆាំងនឹងការឆ្លងមេរោគផ្តាសាយ ហើយបានជួយឱ្យទារកក្នុងផ្ទៃទទួលនូវ Antibodies ផងដែរ។

អនុវត្តទម្លាប់មានអនាម័យ
នៅពេលដែលអ្នកចេញទៅក្រៅ សូមធ្វើការពាក់ម៉ាស់ការពារឱ្យបានជាប់លាប់ ប្រសិនបើប្រព័ន្ធភាពស៊ាំក្នុងរាងកាយរបស់អ្នកមានការធ្លាក់ចុះ។ ប្រសិនបើមានសមាជិកណាម្នាក់នៅក្នុងក្រុមគ្រួសារមានផ្ទុកមេរោគផ្តាសាយ សូមធ្វើការរក្សាគម្លាត និងទំនាក់ទំនងមួយរយៈរហូតទាល់អ្នកជំងឺប្រសើរឡើង ឬជាដាច់ពីជំងឺ។ រក្សាផ្ទះឱ្យមានអនាម័យជានិច្ច មិនមានធូលីដី ព្រោះកត្តាទាំងនេះក៏អាចបង្កឱ្យអ្នកកើតជំងឺផ្តាសាយយ៉ាងងាយស្រួលផងដែរ ម្យ៉ាងសូមឧស្សាហ៍លាងសម្អាត កុំប៉ះរបស់នេះនោះផ្តេសផ្តាស់។

បង្កើនប្រព័ន្ធភាពស៊ាំរបស់អ្នក តាមរយៈរបបអាហារដែលមានតុល្យភាព
បើទោះបីជាមិនមានប្រភេទអាហារណាដែលត្រូវបានបញ្ជាក់ថា បានចូលរួមបង្ការជំងឺគ្រុនផ្តាសាយក៏ដោយ ប៉ុន្តែជាដំណឹងល្អការទទួលទានប្រភេទអាហារដែលសម្បូរទៅដោយវីតាមីន C និងជាតិស័ង្កសីអាចជួយពង្រឹងប្រព័ន្ធភាពស៊ាំរបស់អ្នក និងប្រយុទ្ធប្រឆាំងជាមួយការឆ្លងមេរោគបានយ៉ាងមានប្រសិទ្ធភាព។
ការទទួលទានទឹកឱ្យបានច្រើនក៏ជួយការពារការខ្វះជាតិទឹក ឬសំណើមនៅក្នុងសារពាង្គកាយ និងរក្សាភ្នាសរំអិល (Mucous Membranes) នៃសរីរាង្គកាយរបស់អ្នក។

ធ្វើលំហាត់ប្រាណ និងសម្រាកឱ្យបានច្រើន
ដើម្បីបង្ការជំងឺគ្រុនផ្តាសាយ និងការឆ្លងមេរោគនៃជំងឺផ្សេងៗទៀត អ្នកម៉ាក់អាចសាកល្បងធ្វើលំហាត់មួយចំនួនដែលសមស្របទៅនឹងការលូតលាស់របស់ទារកក្នុងផ្ទៃនៃត្រីមាសនីមួយៗ។ បន្ថែមពីនេះ សូមសម្រាកឱ្យបានគ្រប់គ្រាន់ ដើម្បីឱ្យប្រព័ន្ធភាពស៊ាំរបស់អ្នកនៅតែរឹងមាំ។