វិធីសាស្រ្តក្នុងការទទួលទានផលិតផលបំប៉នសុខភាព ឬ បង្គ្រប់វីតាមីន ឱ្យបានត្រឹមត្រូវ

ផលិតផលបំប៉នសុខភាព – Supplement ត្រូវបានគេប្រើប្រាស់សម្រាប់បំពេញបន្ថែមនូវកង្វះវីតាមីន ឬសារធាតុរ៉ែចិញ្ចឹមក្នុងសរីរាង្គកាយ តាមរយៈការផ្តល់នូវមីក្រូសារជាតិ “គ្រប់គ្រាន់” ជារៀងរាល់ថ្ងៃ ដែលធ្វើឱ្យសុខុមាលភាពទូទៅមានភាពប្រសើរឡើងវិញ។

ឥឡូវនេះ ឡេឌីស៍ នឹងធ្វើការចែករំលែកអំពីវិធីសាស្រ្តក្នុងការប្រើប្រាស់ ក៏ដូចជាទទួលទានផលិតផលបំប៉នសុខភាព (Supplement) ឱ្យបានត្រឹមត្រូវ និងទទួលបានលទ្ធផលជាទីគាប់ចិត្ត ព្រោះថាមានមនុស្សជាច្រើនតែងតែត្អូញត្អែរទៅលើការទទួលទានផលិតផលបំប៉នសុខភាពទាំងនោះ (Vitamin Supplement) មិនសូវទទួលបានប្រសិទ្ធិភាព។

គន្លឹះក្នុងការទទួលទានផលិតផលបំប៉នសុខភាពឱ្យបានត្រឹមត្រូវ ៖

1. ប្រើប្រាស់ទៅតាមសេចក្តីណែនាំ កុំប្រើប្រាស់លើសកំណត់ ត្រូវប្រើប្រាស់តាមសេចក្តីណែនាំរបស់ក្រុមហ៊ុនផលិត ឬ តាមការណែនាំពីអ្នកផ្តល់សេវាថែទាំសុខភាព

2. ពិនិត្យមើលទៅលើគ្រឿងផ្សំ អន្តរកម្មថ្នាំ និងការវិភាគលើភាគរយប្រើប្រាស់ប្រចាំថ្ងៃ (% DV)

3. រក្សាទុកផលិតផលឱ្យបានត្រឹមត្រូវ និងទុកឲ្យឆ្ងាយពីដៃកុមារតូចៗ

4. ប្រសិនបើអ្នកកំពុងប្រើប្រាស់ថ្នាំវេជ្ជសាស្ត្រផ្សេងៗ ដើម្បីព្យាបាលជំងឺប្រចាំថ្ងៃ សូមធ្វើការពិគ្រោះជាមួយវេជ្ជបណ្ឌិតជាមុនសិន

បន្ថែមលើនេះ អ្នកក៏គួរតាមដានស្ថានភាពមួយចំនួន ដើម្បីដឹងថា អ្នកអាចមានប្រតិកម្មជាមួយនឹងផលិតផលនោះឬទេ។ ប្រសិនបើប្រតិកម្ម រាងកាយរបស់អ្នក នឹងបង្ហាញអាការៈដូចជា៖ ឈឺពោះ ក្អួតចង្អោរ ឈឺក្បាល បុកទ្រូង ឬថប់ដង្ហើម ចង្វាក់បេះដូងលោតញាប់ ឡើងកន្ទួលក្រហមលើស្បែក រមាស់ ហើមសាច់ ព្រមទាំងធ្វើឱ្យរាគ បាត់បង់ចំណង់អាហារ និងស្រកទម្ងន់ដោយមិនដឹងខ្លួនទៀតផង។

សូមចំណាំថា ៖ ផលិតផលបំប៉នសុខភាពមួយចំនួន អាចជះផលប៉ះពាល់ទៅលើសុខភាព ជាពិសេសប្រសិនបើអ្នកប្រើប្រាស់មិនបានស្វែងយល់ឲ្យបានត្រឹមត្រូវ ឬប្រើខុសកាលៈទេសៈ ដូចជា ប្រើមុនពេលវះកាត់ ឬប្រើផ្គួបផ្សំជាមួយថ្នាំវេជ្ជសាស្រ្តផ្សេងទៀត។ ចូរចាំថា គួរសាកសួរអ្នកផ្តល់សេវាថែទាំសុខភាព ឲ្យបានច្បាស់លាស់ មុននឹងប្រើ ដោយហេតុ ផលិតផលបំប៉នសុខភាពប្រភេទខ្លះ ត្រូវបានហាមឃាត់ មិនឱ្យស្រ្តីមានផ្ទៃពោះ កុមារតូចៗ ឬអ្នកមានបញ្ហាសុខភាព ប្រើប្រាស់នោះទេ។