សៀវភៅមុខម្ហូបខ្មែរទទួលបានពានរង្វាន់  “សៀវភៅធ្វើម្ហូបល្អបំផុតនៅលើពិភពលោក ”Gourmand World Cookbook Awardsលើកទី ២៩

មុខម្ហូបខ្មែរមានច្រើនមុខ និងមានរសជាតិឈ្ងុយឆ្ងាញ់ ប្រកបដោយសោភ័ណភាព។ មុខម្ហូបខ្មែរមានប្រវត្តិជាង ២ពាន់ឆ្នាំ ដែលត្រូវបានរក្សា និងបន្តដោយជនជាតិខ្មែរពីមួយជំនាន់ទៅមួយជំនាន់។ ឆ្លងកាត់ការវិវដ្ត និងការទទួលឥទ្ធិពលពីសំណាក់ម្ហូបបរទេសដូចជាមុខម្ហូបចិន អ៊ឺរ៉ុប និងឥណ្ឌា បានធ្វើឱ្យមុខម្ហូបខ្មែរកាន់តែទទួលបាននូវប្រជាប្រិយភាព និងពេញនិយមទទួលទាន។ មុខម្ហូបខ្មែរត្រូវបានបែងចែកជា បីប្រភេទដូចជា មុខម្ហូបសម្រាប់ប្រជាជននៅតាមតំបន់,​ មុខមហូបសម្រាប់ប្រជាជនថ្នាក់កណ្តាល និង មុខម្ហូបសម្រាប់ព្រះរាជវង្ស ដែលត្រូវបានហៅថា​ ព្រះក្រយ៉ា។

នាថ្ងៃ៣០ ខែវិច្ឆិកា ឆ្នាំ២០២៣ នៅឯទីក្រុង Riyahd ប្រទេសអារ៉ាបប៊ីសាអូឌីត បានប្រារព្ធពិធីប្រគល់ពានរង្វាន់ Gourmand Award អ្នកសារព័ត៌មានអន្តរជាតិដាក់រហស្សនាមថាជា “ពានរង្វាន់អូស្ការ” ។ Gourmand​ ​World​ ​Cook​book​ ​Award​s ​ត្រូវ​បាន​បង្កើត​ឡើង​ក្នុង​ឆ្នាំ​១​៩​៩​៥​ ដោយ​ ​E​do​u​ar​d​ ​Coin​t​r​e​a​u ​ជាមួយនឹង​គោលដៅ​នៃ​ការ​គាំទ្រ​ប្រពៃណី​ធ្វើម្ហូប​ពី​ជុំវិញ​ពិភពលោក​។ ក្នុងពិធីនោះ សៀវភៅធ្វើម្ហូបខ្មែរឈ្មោះ “សោយ” ដែលជាស្នាដៃ របស់ខ្មែរសុទ្ធសាធ ហើយត្រូវរៀបរៀង ដោយចុងភៅលំដាប់ប្រទេស ដែលគ្រប់គ្នាស្គាល់ថា “Chef Nak “បានទទួលបានជ័យលាភី “សៀវភៅធ្វើម្ហូបល្អបំផុតនៅលើពិភពលោក” ​។ គួរបញ្ជាក់ផងដែរថា​ នៅ​ឆ្នាំ​២​០​២​១​ ​និង​២​០​២​២​ ​សៀវភៅធ្វើម្ហូបខ្មែរឈ្មោះ “សោយ” ​បាន​ឈ្នះ​ពានរង្វាន់​សៀវភៅ​មុខម្ហូប​អាស៊ី​ដែល​ល្អដាច់គេ​(​Best​ ​Asian​ Cu​i​sin​e​ ​Book​)​ និង​ពានរង្វាន់​មុខម្ហូប​សម្រាប់​ប្រមុខរដ្ឋ ​(​Best​ ​Head​s o​f​ ​State​/​Food​)​​ ពី​ ​Gourmand​ ​World​ ​Cook​book​ ​Award​s ​ផងដែរ។​

យោង​តាម​ក្រសួងការបរទេស​ ​និង​សហប្រតិបត្តិការ​អន្តរជាតិ​បាន​ឱ្យ​ដឹង​ថា​ ​ការទូត​ផ្នែក​ធ្វើម្ហូប​គឺជា​ផ្នែក​មួយ​ដ៏​សំខាន់​នៃ​យុទ្ធសាស្ត្រ​ការទូត​សេដ្ឋកិច្ច​របស់​​​ក្រសួង​ដែល​បាន​ដាក់​ចេញ​នៅ​ឆ្នាំ​២​០​២​១​។​ ​យុទ្ធសាស្ត្រ​នេះ​មាន​គោលបំណង​លើក​ក​ម្ពស់​ជំហរ​អន្តរជាតិ​របស់​កម្ពុជា​ ​និង​រួមចំណែក​ក្នុង​ការ​សម្រេច​បាន​នូវ​ចក្ខុវិស័យ​របស់​រាជរដ្ឋាភិបាល​ក្នុង​ការ​ក្លាយ​ជា​ប្រទេស​ដែល​មាន​ចំណូល​មធ្យម​ក​ម្រិ​ត​ខ្ពស់​នៅ​ឆ្នាំ​២​០​៣​០​ ​និង​ជា​ប្រទេស​ដែល​មាន​ចំណូល​ខ្ពស់​នៅ​ឆ្នាំ​ ​២​០​៥​០​។​