ស្រោមអនាម័យប្រណិត ផ្តោតសំខាន់លើនារី កំពុងទទួលបានការគាំទ្រខ្លាំង នៅតំបន់អឺរ៉ុប

ស្រោមអនាម័យប្រណិត កំពុងកើនឡើងនូវទីផ្សារយ៉ាងខ្លាំង នៅក្នុងរយៈពេលប៉ុន្មានឆ្នាំចុងក្រោយនេះ។ ជាក់ស្តែងក្រុមហ៊ុនផលិតស្រោមអនាម័យ នៅលើពិភពលោកបាននឹងកំពុងពិចារណា កែសម្រួល​នូវផលិតផលរបស់ពួកគេ ឱ្យមើលទៅប្រណិតរាប់ចាប់ពីប្រអប់វេចខ្ចប់ និង ការរចនាកញ្ចប់ស្រោមអនាម័យ ជាដើម។ នៅក្នុងតំបន់អឺរ៉ុប ស្រោមអនាម័យប្រណិត លក់បានថ្លៃបានជាងស្រោមអនាម័យធម្មតា បើទោះបីជាគុណភាពស្រោមប្រហាក់ប្រហែលគ្នាយ៉ាងណាក្តី។

 

អស់រយៈជាច្រើនឆ្នាំមកហើយ ដែលស្រោមអនាម័យ មានការកែប្រែនូវការ design តិចតួចប៉ុណ្ណោះ។ ជាការពិត ក្រុមហ៊ុនផលិតស្រោម បាននឹងកំពុងរិះរកចំណុចទាក់ទាញថ្មីៗ ដើម្បីតម្រូវចិត្តអតិថិជនជំនាន់ថ្មីដែលចូលចិត្តនូវរបស់ថ្មីប្លែកៗ។ ការចេញលក់ ស្រោមដែលមានក្លិនផ្លែឈើ ដូចជាក្លិនចេក ក្លិនប៉ោម ឫ ក្លិនផ្សេងទៀត គឺជាយុទ្ធសាស្រ្តទីផ្សារដើម្បីបង្កើនចំណាប់អារម្មណ៍ គោលដៅទី១ដើម្បីបង្កើនការលក់ និង ទី២ដើម្បីជម្រុញការប្រើប្រាស់ស្រោមអនាម័យ នៅពេលរួមភេទ។

ស្ថាបនិកនៃក្រុមហ៊ុនផលិតស្រោមអនាម័យមួយរបស់អង់គ្លេស​ បានឱ្យដឹងថា ក្រុមហ៊ុនលោកមានគោលដៅក្នុងការផលិតស្រោមមួយប្រភេទ ដែលអាចជួយដល់ស្រ្តីឱ្យកាន់តែមានក្តីសុខបន្ថែមទៀត នៅអំឡុងពេលប្រតិបត្តិការប្រយុទ្ធនៅលើគ្រែ។ ស្ថាបនិកក្រុមហ៊ុនផលិតស្រោមអនាម័យដ៏ល្បីល្បាញនៅអង់គ្លេសរូបនេះ បន្តឱ្យដឹងថា ស្រោមអនាម័យធម្មតា ផលិតមកផ្តោតសំខាន់ជាជំនួយដល់ខាងបុរស ដោយមានមុខងារជួយឱ្យបុរស ប្រតិបត្តិការបានយូរ ជាងមុនជាដើម។

 

ជារឿងធម្មតាដែលស្រ្តី មិនដែលធ្លាប់ស្រាវជ្រាវទៅលើការជ្រើសរើសស្រោមអនាម័យ និង អ្វីដែលពួកគេពេញចិត្ត ហេតុ​នេះទើប​ជារឿយៗ ស្រ្តីតែងតែយល់ព្រមជានិច្ច ជាមួយស្រោមដែលដៃគូ របស់ពួកគេបានជ្រើស។ “ពួកយើងផ្តោតលើអ្វីដែលស្រ្តីត្រូវការ ជាចំបង ហើយបច្ចុប្បន្ននេះ ពួកយើងមិនទាន់ឃើញមាន brands ណាមួយដែលផលិតស្រោមអនាម័យ ផ្តោតសំខាន់ចំពោះស្រ្តី នៅឡើយទេ”។ នេះបើតាមការថ្លែងឱ្យដឹងពីលោក Kabir ម្ចាស់ក្រុមហ៊ុនផលិតស្រោមអនាម័យដ៏ធំមួយនៅអង់គ្លេស។ លោកបន្តថា “ក្រុមហ៊ុនយើងបានធ្វើការ ស្ទង់មតិ​ស្រ្តី ២០០០នាក់ ដើម្បី​ចង់ដឹងថា ពួកយើងចង់បានស្រោមអនាម័យបែបណា? ហើយពួកយើងបានទទួលចម្លើយមកវិញ ដោយស្រ្តីមួយភាគធំ ចង់បានស្រោមអនាម័យដែលមានគុណភាព ការ design មានភាពប្រណិត មានមុខងារជួយជម្រុញអារម្មណ៍ស្រ្តីឱ្យដល់គោលដៅ​ និងមានទំហំស្តើងខ្លាំង ultra thin ”៕