ហង្ស សុជាតា៖ យើងជាកូនខ្មែរ ត្រូវចូលរួមថែរក្សាអ្វីដែលជារបស់ខ្មែរ

ចូលរួមក្នុងកម្មវិធីអបអរបុណ្យចូលឆ្នាំខ្មែរប្រពៃណីជាតិនៅសាលាមធ្យមសិក្សាវិចិត្រសិល្បៈថ្មីៗនេះ កញ្ញា ហង្ស សុជាតា តារាចម្រៀងរៀមច្បងស្នើឲ្យជនរួមជាតិចូលរួមថែរក្សាកេរតំណែលសិល្បៈវប្បធម៌ខ្មែរទាំងអស់។

សុជាតា ជាសិល្បករម្នាក់ក្នុងចំណោមសិល្បករខ្មែរជាច្រើនរូបទៀតមាន នី មុន្នីនាថ មាន សូនីតា សាយ សៀរ៉ា នៅ សុនិតា ជាដើមដែលបានចូលរួមកម្មវិធីអបអរបុណ្យចូលឆ្នាំខ្មែរប្រពៃណីជាតិនៅសាលាមធ្យមសិក្សាវិចិត្រសិល្បៈទើបបញ្ចប់ទៅថ្មីៗ។

ក្នុងបរិយាកាសពោរពេញដោយស្មារតីជាតិនិយមរបស់ក្រុមយុវជនស្រឡាញ់វប្បធម៌ខ្មែរ សុជាតា បានបង្ហោះសារថា នាងមានចិត្តសប្បាយរីករាយខ្លាំងណាស់ដែលបានចូលរួមក្នុងកម្មវិធីនេះ។

ក្នុងរូបភាព ស្លៀកសំលៀកបំពាក់ប្រភេទរ៉ូបច្នៃពីក្រមាខ្មែរ សុជាតា អង្គុយយ៉ាងសមសួន លើកដៃប្រណម្យពីមុខមុខខ្មុកល្ខោនខោលខ្មែរញញឹមពព្រាយ។ ក្នុងកាលៈទេសៈនេះ នាងលើកឡើងថា “ក្នុងនាមយើងជាកូនខ្មែរនាំគា្នជួយថែរក្សាកាពារអ្វីដែរជាប្រពៃណីកេត្ត៍តំណែលរបស់ខ្មែរ”។

សារជាតិនិយមមួយចេញពីសិល្បកររៀមច្បងរូបនេះ បានធ្វើឲ្យប្រិយមិត្តជាច្រើនរបស់បានសម្ដែងពេញចិត្ត និងគាំទ្រ។ជាមួយគ្នា ពួកគេសរសើរថា អាយដល របស់ពួកគេក្នុងឈុតសំលៀកបំពាក់ច្នៃពីក្រមានេះ ពិតជាស្រស់ស្អាត និងមើលទៅនៅតែក្មេងដដែល។

ហង្ស សុជាតា ជាតារាចម្រៀងរៀមច្បងម្នាក់ ដែលបច្ចុប្បន្ន បានបង់ឱកាសជាច្រើននៅក្នុងសកម្មភាពការងារសិល្បៈ ក្រោមការរុញច្រានរបស់សិល្បកររលកក្រោយ។ យ៉ាងណា នាងនៅតែចេញមុខតាមបណ្ដាញសង្គម និងការងារសិល្បៈបែបសង្គមខ្លះដែរ ដូចកម្មវិធីខាងលើជាដើម៕