អត្ថប្រយោជន៍នៃការសិក្សានៅបរទេស

ការសិក្សានៅបរទេស គឺជាឱកាសដ៏ធំមួយ ដើម្បីអនុញ្ញាត្តឱ្យសិស្ស និសិត្សរកឃើញខ្លួនឯងនៅពេលដែលពួកគេទទួលបានការយល់ដឹងអំពីវប្បធម៌ខុសៗគ្នា ការរស់នៅកន្លែងថ្មីដោយទីពឹងលើខ្លួនឯង និងការសាកល្បងសមត្ថភាពរបស់ខ្លួនក្នុងការសម្របខ្លួនទៅនឹងស្ថានភាពផ្សេងៗ រួមទាំងការរិះរកមធ្យោបាយដោះស្រាយបញ្ហាដោយខ្លួនឯង។

សិស្សានុសិស្សទទួលបានបំណិនជីវិតដ៏មានតម្លៃ បង្កើតទំនាក់ទំនងអន្តរជាតិ និងទទួលបានទស្សនវិស័យជាលក្ខណៈសកលតាមរយៈការសម្របខ្លួនទៅនឹងវប្បធម៌ថ្មីៗ និងបរិយាកាសដែលរួមផ្សំនូវប្រកួតប្រជែង។ បទពិសោធន៍ទាំងអស់នេះ អាចជួយសិស្សានុសិស្សមានការអភិវឌ្ឍន៍ភាពធន់ ការសម្របខ្លួន និងបង្កើនសមត្ថភាពដោះស្រាយរាល់បញ្ហា។

អត្ថប្រយោជន៍នៃការសិក្សានៅបរទេស ៖

រៀនរស់នៅដោយឯករាជ្យ

ការផ្លាស់ប្តូរមជ្ឈដ្ឋានរស់នៅទៅបរទេសមួយរយៈ អាចឱ្យសិស្សានុសិស្សស្វែងយល់ដឹងពីខ្លួនឯងកាន់តែច្បាស់ ហើយរៀនរស់នៅដោយឯករាជ្យ។ ពួកគេត្រូវរៀនចេះពឹងលើខ្លួនឯង រិះរកវិធីសាស្រ្តដោះស្រាយឱបសគ្គផ្សេងៗ និងមានទំនួលខុសត្រូវលើកាតព្វកិច្ចផ្ទាល់ខ្លួន។

យល់ដឹងអំពីវប្បធម៌ចម្រុះជាតិសាសន៍

ការសិក្សានៅបរទេស អាចផ្តល់ឱកាសឱ្យសិស្សានុសិស្សរៀនពីមនុស្សក្នុងសង្គមដ៏ទៃ និងស្វែងយល់ដឹងពីវប្បធម៌ផ្សេងៗដែលឆ្លុះបញ្ចាំងពីសង្គមអន្តរជាតិ។

ពង្រឹងផ្នត់គំនិតជាសកល (Global perspective)

មិនថាសម្រាប់ការសិក្សា ការធ្វើការងារ ឬបទពិសោធន៍ផ្សេងៗនោះទេ សង្គមបច្ចុប្បន្នតែងតម្រូវឱ្យអ្នកចេះប្រើប្រាស់ផ្នត់គំនិតឱ្យទូលំទូលាយ ហើយតាមឱ្យទាន់ការវិវឌ្ឍន៍នៃសង្គម។

រុករក និងស្វែងយល់អ្វីដែលថ្មីប្លែក

ក្រៅពីម៉ោងសិក្សាក្នុងសាលានិងសម្រាក សិស្ស និសិត្សនឹងមានពេលគ្រប់គ្រាន់សម្រាប់ធ្វើដំណើរកម្សាន្ត រុករក និងស្វែងយល់អ្វីៗដែលថ្មីហើយប្លែកខុសពីសង្គមកំណើត។

បទពិសោធន៍ជីវិតដ៏មានន័យ

ការសិក្សា និងការរស់នៅក្នុងសង្គមថ្មីមួយអាចនឹងនាំមកនូវបទពិសោធន៍ជីវិតថ្មី ប្លែក រួមផ្សំនឹងភាពផ្សងព្រេង ដែលនឹងក្លាយជាល្បោយជីវិតដ៏មានន័យនៅពេលអនាគត។

មានលទ្ធភាពស្វែងរកអាជីពការងារទាំងក្នុង និងក្រៅប្រទេស

មិនត្រឹមតែមានភាពលេចធ្លោរក្នុងការស្វែងរកការងារនៅក្នុងស្រុកទេសកំណើតនោះទេ អ្នកក៏អាចមានឱកាសទទួលបានការងារនៅក្រៅប្រទេសផងដែរ។
ដូច្នេះហើយ បើសិនជាមានឱកាស អ្នកគួរតែសិក្សានៅបរទេស ទោះបីជារយៈពេលនៃការសិក្សានោះខ្លីក៏ដោយ។ អ្នកមិនចាំបាច់ទៅសិក្សារហូតដល់ទៅរាប់ឆ្នាំនោះទេ។

សិស្ស និសិត្សប្រហែលជាមានការព្រួយបារម្ភខ្លះៗ មុនពេលចាកចេញពីប្រទេសកំណើត បន្តការសិក្សានៅបរទេស ប៉ុន្តែសូមកុំបារម្ភ ត្រូវចងចាំថា ការសិក្សានៅបរទេស គឺឱកាសដ៏ថ្លៃថ្លាមួយ សម្រាប់ទទួលបាននូវបទពិសោធន៍ថ្មីៗ និងចំណេះដឹងយ៉ាងទូលំទូលាយ។