អាកាសយានដ្ឋានអន្តរជាតិតេជោ នឹងបើកឱ្យប្រតិបត្តិការនៅថ្ងៃទី៩ ខែកញ្ញា ខាងមុខនេះ!

អាកាសយានដ្ឋានអន្តរជាតិតេជោលំដាប់ថ្នាក់ 4F តម្លៃ១៥០០លានដុល្លារ នឹងត្រូវបើកប្រតិបត្តិការជាផ្លូវការ នៅថ្ងៃទី៩ ខែកញ្ញា ឆ្នាំ២០២៥។

អាកាសយានដ្ឋានអន្តរជាតិតេជោ ស្ថិតនៅស្រុកកណ្តាលស្ទឹង ខេត្តកណ្តាល ដែលមានចម្ងាយប្រមាណ ២០គីឡូម៉ែត្រភាគខាងត្បូងនៃរាជធានីភ្នំពេញ។ អាកាសយានដ្ឋានអន្តរជាតិខ្នាតធំលំដាប់ 4F នេះអាចអនុញ្ញាតឱ្យយន្តហោះប្រភេទធុនធំៗដូចជា Airbus A380-800 និង យន្តហោះ Boeing 747-800 ចុះចតបាន។ អាកាសយានដ្ឋាននេះរចនាឡើងជា ៣ ដំណាក់កាល ដោយដំណាក់កាល១ ពីឆ្នាំ២០២០ ដល់២០៣០ អាចទទួលភ្ញៀវបានចំនួន ១៥ លាននាក់, ដំណាក់កាលទី ២ ឆ្នាំ២០៣០ ដល់ឆ្នាំ២០៥០ ទទួលភ្ញៀវបាន ៣០ លាននាក់ និងដំណាក់កាលពី ៣ ចាប់ពីឆ្នាំ២០៥០ អាចទទួលភ្ញៀវបាន ៤៥ លាននាក់។

អាកាសយានដ្ឋានអន្តរជាតិតេជោ ពុំមែនតែជានិមិត្តរូបនៃភាពល្អមើលប៉ុណ្ណោះទេ ប៉ុន្តែគឺបង្ហាញពីការរីកចម្រើនរបស់កម្ពុជា និងការទាក់ទាញភ្ញៀវទេសចរ ពោលគឺជាចលករសម្រាប់ជម្រុញកំណើនសេដ្ឋកិច្ចជាតិ និងលើកកម្ពស់ជីវភាពប្រជាជនក្នុងស្រុក។

ព្រលានយន្តហោះនេះទៀតសោត ក៏នឹងចូលរួមទាក់ទាញ និងជម្រុញវិស័យទេសចរណ៍ឱ្យកាន់តែមានភាពរីកចម្រើនបន្ថែម ដើម្បីបង្កើតការងារ និងបង្កើនចំណូលជូនប្រជាពលរដ្ឋផងដែរ។

សូមជម្រាបជូនផងដែរថា ពិធីសម្ពោធជាផ្លូវការរបស់ អាកាសយានដ្ឋានអន្តរជាតិតេជោ នឹងប្រព្រឹត្តទៅនៅថ្ងៃទី២០ ខែតុលា ឆ្នាំ២០២៥ ក្រោមអធិបតីភាពដ៏ខ្ពង់ខ្ពស់របស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។

អាកាសយានដ្ឋានអន្តរជាតិតេជោ ប្រៀបដូចជានិមិត្តសញ្ញានៃកម្ពុជាសម័យថ្មី ដែលបង្ហាញពីការរីកចម្រើន រួមបញ្ចូលនូវភាពទំនើបផ្សាផ្ជាប់ជាមួយវប្បធម៌ និងប្រពៃណីដ៏សម្បូរនៃប្រជាជាតិកម្ពុជាទាំងមូល។

ផលិតដោយ៖ KiloTRAVEL