ប្លែក! ចាប់យកបទពិសោធន៍នៃការស្នាក់នៅ សណ្ឋាគារលើវាលខ្សាច់ដ៏ធំល្វឹងល្វើយ

អនុញ្ញាតឱ្យខ្លួនឯងឈានជើងចូលទៅរកការផ្សងព្រេងនៅលើវាលខ្សាច់ធំល្វឹងល្វើយ ជាមួយនឹងទីតាំងដ៏អស្ចារ្យនៃរមណីយដ្ឋាន ឬសណ្ឋាគារលើវាលខ្សាច់ដែលស្ថិតក្នុងកន្លែងដាច់ស្រយាលបំផុតមួយចំនួននៅលើភពផែនដី។

ខណៈពេលដែលអ្នកមានបំណងចង់គេចពីភាពត្រជាក់នៃរដូវរងា ហើយទទួលបានភាពកក់ក្តៅពីខ្សាច់នៅក្រោមបាតជើង ឬអាចគយគន់ពន្លឺផ្កាយយ៉ាងភ្លឺច្បាស់នាពេលរាត្រី ជាពិសេសមានទីតាំងដាច់ស្រយាលពីទីក្រុងដ៏ស្មុគស្មាញ សូមធ្វើដំណើរកំសាន្តទៅកាន់ Egypt, Namibia, Morocco, Israel និង Saudi Arabia។

សណ្ឋាគារប្រកបដោយប្រណីតភាពវិសេសវិសាលទាំងនេះសន្យាថានឹងមានការរត់គេចពីហ្វូងមនុស្សដោយកំណត់អត្ថន័យនៃការធ្វើដំណើរក្រៅបណ្តាញ។

Habitas Al Ula, Saudi Arabia

Habitas បានបើកដំណើរការទទួលភ្ញៀវទេសចរនៅចុងឆ្នាំ 2021។ Habitas Al Ula គឺជាសណ្ឋាគារនៅតំបន់វាលខ្សាច់ដ៏ស្ងប់ស្ងាត់មួយ ដែលស្ថិតនៅក្នុងចន្លោះជ្រលងភ្នំ Ashar យ៉ាងដាច់ស្រយាលនៅក្នុងប្រទេសអារ៉ាប៊ីសាអូឌីត មានបំពាក់ដោយអាងហែលទឹកដ៏ធំ និងមានទីកន្លែងសម្រាប់ងូតទឹកគយគន់ព្រះអាទិត្យលិច។ សណ្ឋាគារនេះបានសាងសង់ឡើងដោយប្រើប្រាស់វត្ថុធាតុដើមធម្មជាតិដើម្បីអាចឆ្លុះបញ្ចាំងឱ្យឃើញអំពីពណ៌នៃទេសភាព ដោយមានលក្ខណៈជាកូនវីឡាកម្ពស់ទាបចំនួន 96 បញ្ចូលគ្នានៅបរិវេណនៃវាលខ្សាច់ជុំវិញ។

Six Senses Shaharut, Israel

Six Senses Shaharut មានទីតាំងស្ថិតនៅក្នុងជ្រលងភ្នំ Arava នៃប្រទេសអ៊ីស្រាអែល ភ្ញៀវទេសចរអាចធ្វើដំណើរត្រឹមរយៈពេល 4ម៉ោងប៉ុណ្ណោះពីទីក្រុង Tel Aviv ។ សណ្ឋាគារបានធ្វើការបើកដំណើរកាលពី 2 ឆ្នាំមុន ដោយនៅទីនោះមានកញ្ចប់សេវាកម្មរហូតដល់ 60 ឈុត និងកូនវីឡាបំពាក់អាងហែលទឹក ដែលទាំងអស់នេះត្រូវបានរចនាឡើងដើម្បីផ្តល់នូវទិដ្ឋភាពដ៏ងស្ចារ្យគ្មានដែនបញ្ចប់ ម្យ៉ាងអ្នកអាចអង្គុយគយគន់ទេសភាពថ្ងៃលិចនៃផ្កាភ្លើងនៅទូទាំងវាលខ្សាច់ Negev ។ ការរចនា និងតុបតែងរបស់ Six Sense Shaharut បានឆ្លុះបញ្ចាំងពីទេសភាពបែប Monochromatic សភាពស្ងួត និងថ្មដុំៗជាថ្នាក់។

Zannier Hotels Sonop, Namibian

សណ្ឋាគារមួយនេះមានទីតាំងនៅលើផ្ទៃដីឯកជនមានទំហំ 13,800 ហិចតានៃវាលរហោស្ថានវាលខ្សាច់ Namibian ដែលមិនមានបង្កការរំខាន និងប៉ះពាល់ពីបរិយាកាសអ៊ូអរខាងក្រៅ។ Zannier Hotels Sonop មានកូនផ្ទះសណ្ឋានចំនួន 10 ដែលត្រូវបានសាងសង់នៅលើកំពូលនៃផ្ទាំងថ្មក្រានីត តាមលំនាំរចនាប័ទ្មបែបសម័យអាណានិគមអង់គ្លេសនៃឆ្នាំ 1920 ត្រូវបានបំពាក់ដោយគ្រែបួនផ្ទាំង តេឡេស្កុប ចង្កៀងគោម តុបុរាណ និងបន្ទប់ទឹក។ ។ ដោយវាមានសណ្ឋានលាតសន្ធឹងធំល្វឹងល្វើយបានទាក់ទាញភាពស្រស់ស្អាតគ្មានព្រំដែននៅជុំវិញអ្នក ជាមួយនឹងដំណើរផ្សងព្រេងតាំងព្រះអាទិត្យរះឡើងរហូតដល់លិចទៅវិញ។

Les Roches Noires, Morocco

ធ្វើដំណើរត្រឹមតែ 30 គីឡូម៉ែត្រពីទីក្រុង Marrakesh អ្នកនឹងបានទៅដល់ឋានសួគ៌នៃភាពស្ងប់ស្ងាត់ទាំងស្រុងនៅវាលខ្សាច់ Agafay របស់ប្រទេសម៉ារ៉ុក គឺ Les Roches Noires។ នៅទីនោះនឹងផ្តល់នូវបទពិសោធន៍នៃការបោះជំរុំបែបពនេចរពិតប្រាកដដល់ភ្ញៀវ ដោយកាន់កាប់លើកំពូលភ្នំដីថ្មក្រហមនៃវាលខ្សាច់ ទិដ្ឋភាព 360 ដឺក្រេលើទេសភាពស្ងួតឆ្ពោះទៅកាន់ភ្នំ Atlas ប្រៀបដូចជាការបោះជំរុំនៅលើភពអង្គារ។