រឿងរ៉ាវអំពី Balenciaga អ្នករចនាម៉ូតល្បីល្បាញជនជាតិអេស៉្បាញ

Balenciaga ជាហាងច្នៃម៉ូតហ្វេសសិនសម្លៀកបំពាក់មួយបង្កើតឡើងដោយលោក Cristóbal Balenciaga ដែលជាអ្នករចនាម៉ូតដ៏ល្បីល្បាញមួយរូប មានទីកន្លែងកំណើតស្ថិតនៅខេត្ត Basque ប្រទេសអេស្ប៉ាញ។ លោកទទួលបានកិត្តិនាមជា អ្នករចនាម៉ូតកាត់ដេរលំដាប់ស្តង់ដារខ្ពស់ ពីលោក Christian Dior។

ជីវប្រវត្តិ Cristóbal Balenciaga

លោក Balenciaga ប្រសូត្រនៅថ្ងៃទី21 ខែមករា ឆ្នាំ 1895 នៅទីក្រុង Basque Getaria ប្រទេសអេស៉្បាញ។ ម្តាយរបស់លោកមានឈ្មោះ Martina Eizaguirre Embil គឺជាជាងកាត់ដេរសម្លៀកបំពាក់ដ៏ចំណានម្នាក់ កាលនៅវ័យកុមារ Balenciaga តែងតែចំណាយពេលវេលានៅជាមួយម្តាយខណៈពេលដែលកំពុងបំពេញការងារ។ លុះដល់អាយុ 12ឆ្នាំ Balenciaga បានចាប់ផ្តើមចាប់យកអាជីពហ្វឹកហាត់ជាកូនជាងកាត់ដេរ ក្រោយមកនៅពេលគាត់ចម្រើនវ័យជំទង់ ក៏មានស្រ្តីអភិជនមួយរូបមានឈ្មោះ លោកស្រី Marchoiness de Casa Torres បានក្លាយខ្លួនជាអតិថិជនដំបូងបំផុតរបស់គាត់។

Balenciaga ទទួលបានភាពជោគជ័យ អំឡុងពេលដែលគាត់ចាប់ផ្តើមចាប់អាជីពជាអ្នករចនាម៉ូតសម្លៀកបំពាក់នៅក្នុងប្រទេសអេស្ប៉ាញ។ លោកបានបើកហាងសម្លៀកបំពាក់មួយនៅក្នុងតំបន់ San Sevastián ប្រទេសអេស្ប៉ាញ និងបានពង្រីកសាខារបស់ខ្លួនទៅកាន់ ទីក្រុង Madrid និង ទីក្រុង Barcelona។ Balenciaga ជាប់ឈ្មោះជាអ្នករចនាម៉ូតសម្លៀកបំពាក់ជូនខ្សែរាជវង្ស និងពួកវណ្ណៈអភិជន ប៉ុន្តែជាអកុសលដោយ សារតែសង្គ្រាមស៊ីវិលអេស្ប៉ាញកើតឡើង បានបង្ខំឱ្យហាងរបស់គាត់ត្រូវបានបិទទ្វារ ហើយ Balenciaga ក៏បានផ្លាស់ទីលំនៅមកកាន់ទីក្រុងប៉ារីស នៅឆ្នាំ1937។

នៅឆ្នាំ 1960 Balenciaga បានកាត់រ៉ូបអាពាហ៍ពិពាហ៍ដ៏ស្រស់ស្អាតដល់ព្រះអង្គម្ចាស់ក្សត្រី Fabiola de Mora y AragÓn នៅពេលទ្រង់រៀបអភិសេកជាមួយព្រះអង្គម្ចាស់ Baudouin I of Belgium។ ក្រោយមកទ្រង់ក៏បានបរិច្ចាគរ៉ូបនេះទៅកាន់មូលនិធិ Cristóbal Balenciaga Foundation។

Balenciaga បានបើកថ្នាក់បង្រៀនផ្នែករចនាម៉ូតសម្លៀកបំបាក់ហ្វេសសិន ដែលជម្រុញឱ្យអ្នករចនាម៉ូតល្បីៗជាច្រើនមានការចូលរួម ដូចជា ៖1. Oscar de la Renta2. André Courréges3. Emanuel Ungaro 4. Mila Schön 5. Hubert de Givenchy