BVLGARI AETERNA EVENT ប្រារព្ធឡើងនៅប្រាសាទបាយ័ន ទឹកដីខេត្តសៀមរាប

នាយប់ថ្ងៃទី 21 ខែកុម្ភៈ ឆ្នាំ 2025 BVLGARI ដែលជាម៉ាកយីហោគ្រឿងអលង្ការយ៉ាងល្អឯក និងល្បីលំដាប់ពិភពលោក បានរៀបចំកម្មវិធី ឈ្មោះ “BVLGARI AETERNA” ដើម្បីបង្ហាញម៉ូតគ្រឿងអលង្ការប្រណីតរបស់ខ្លួន នៅប្រាសាទបាយ័ន ក្នុងខេត្តសៀមរាប។

កម្មវិធីបង្ហាញម៉ូតគ្រឿងអលង្ការដ៏អធិកអធមនេះ ត្រូវបានរៀបចំឡើងដោយមានការចូលរួមរបស់វត្តមាន តារាល្បីៗជាច្រើន រួមមាន តារាសម្តែងរបស់កម្ពុជា កញ្ញា ស៉ីន យូប៊ីន និងអ្នកនាងប្រាសាទ ដាវិន, តារាសម្តែងរបស់ថៃ កញ្ញា Mai Davika, តារាសម្តែងថៃ Mile Phakphum, តារាសម្តែងសិង្ហបុរី Shawn Thia, តារាសម្តែងសិង្ហបុរី Ayden Sng, តារាចម្រៀងវៀតណាម Ho Ngoc Ha, បវរកញ្ញាហ្វីលីពីន (Miss Universe 2025) ឈ្មោះ Pia Wurtzbach ព្រមទាំងតារាល្បីៗជាច្រើនទៀត មកពីជុំវិញពិភពលោក។

BVLGARI បានជឿជាក់យ៉ាងមុតមាំថា Collection គ្រឿងអលង្ការ ឈ្មោះ “Aeterna” មានទំនាក់ទំនងយ៉ាងរឹងមាំ ជាមួយនឹងរឿងគ្រប់យ៉ាង ដែលតំណាងឱ្យខេត្តសៀមរាប នៃព្រះរាជាណាចក្រកម្ពុជា ជាពិសេសប្រាង្គប្រាសាទបុរាណដ៏អច្ឆរិយៈ។

ព្រឹត្តិការណ៍នេះបានចូលរួមលើកមុខមាត់ប្រទេសកម្ពុជាទាំងមូល និងលើកស្ទួយផ្នែកវប្បធម៌ជាតិខ្មែរ បង្ហាញទៅកាន់ពិភពលោក រីឯផ្នែកទេសចរណ៍ក៏នឹងប្រាកដជាមានការរីកចម្រើនផងដែរ ព្រោះថាម៉ាកយីហោកម្រិតពិភពលោកនេះ បានជ្រើសយកប្រទេសកម្ពុជាធ្វើជាទីតាំងសម្រាប់រៀបចំព្រឹត្តិការណ៍បង្ហាញម៉ូតដ៏មហាអស្ចារ្យ ហើយថែមទាំងមានការចូលរួមពីបណ្តាបុគ្គលល្បីៗជុំវិញពិភពលោកទៀតផង។