ខ្មែរ
English
“House of Dior” ត្រូវបានបង្កើតឡើងនៅថ្ងៃទី 16 ខែធ្នូ ឆ្នាំ 1946 នៅ 30 Avenue Montaigne ក្នុងទីក្រុងប៉ារីស។ Dior ជាម៉ាកប្រេនដ៏ប្រណិតមួយក្នុងចំណោមម៉ាកប្រេនទាំងអស់ដែលបានឈរឈ្មោះមកជាច្រើនសតវត្សមកហើយ Dior រួមមានផលិតផលជាច្រើនដូចជា កាបូប សម្លៀកបំពាក់ ស្បែកជើង គ្រឿងសំអាង ទឹកអប់ និងគ្រឿង Accessories។ សព្វថ្ងៃនេះ Dior គឺជាកម្មសិទ្ធរបស់ក្រុមហ៊ុន Arnault Group។
លោក Christian Ernest Dior គឺជាអ្នករចនាម៉ូដជនជាតិបារាំងដ៏ល្បីល្បាញ និងជាស្ថាបនិកនៃផ្ទះម៉ូដកំពូលមួយនៅក្នុងពិភពលោកគឺ Christian Dior SE “Dior” ប្រសូត្រនៅថ្ងៃទី 21 ខែមករា ឆ្នាំ1905 នៅទីក្រុង Granville ដែលជាទីក្រុងមាត់សមុទ្រ Normandy នៃប្រទេសបារាំង។ លោកកើតនៅក្នុងត្រកូលគ្រួសារអ្នកមានស្តុកស្តម្ភ ហើយមានបងប្អូនចំនួន 5នាក់ – ឪពុកគឺជាម្ចាស់រោងចក្រផលិតជី។ នៅពេលលោកមានអាយុ 5ឆ្នាំ គ្រូសារក៏បានផ្លាស់ទីលំនៅមកទីក្រុងប៉ារីស។
ឪពុករបស់លោក Dior មានបំណងចង់ឱ្យលោកក្លាយទៅជាអ្នកការទូតបរទេស ប៉ុន្តែដោយមានទេពកោសល្យខ្លាំងលើផ្នែកសិល្បៈ គំនូរ និងការច្នៃម៉ូត… នៅឆ្នាំ 1928 ឪពុករបស់លោកក៏បានជ្រោមជ្រែងបើកហាងលក់គំនូរ និងវិចិត្រសាលសិល្បៈតូចមួយក្នុងទីក្រុងប៉ារីស។ នៅក្នុងហាងរបស់លោក មានការដាក់បង្ហាញស្នាដៃរបស់វិចិត្រករល្បីៗដូចជា Salvador Dali, Man Ray និង Jean Cocteau។ ប៉ុន្តែជាអកុសល ដោយសារក្នុងអំឡុងពេលនោះគឺជាពេលដែលនៅចំកណ្តាលនៃវិបត្តិសេដ្ឋកិច្ចដ៏ធំ (1929-1939) អាជីវកម្មរោងចក្ររបស់ឪពុកបានដួលរលំ ហើយលោក Dior ត្រូវបង្ខំចិត្តបិទហាងគំនូររបស់ខ្លួន។
នៅឆ្នាំ 1937 លោក Dior បានចូលបម្រើរការងារជាមួយអ្នកច្នៃម៉ូតល្បីឈ្មោះរបស់បារាំង គឺលោក Robert Piquet ដែលអ្នកច្នៃម៉ូដរូបនេះ បានធ្វើការបង្ហាត់បង្រៀន និងអោយ Dior ចេញ Collection ចំនួន ៣។ Dior បាននិយាយថា Robert Piquet បានបង្រៀនលោកពីគន្លឹះសំខាន់ៗនៃភាពប្រណិតរបស់សម្លៀកបំពាក់ ។
ក្រោយពីចូលបម្រើជួរកងទ័ព នៅឆ្នាំ 1946 លោកបានបានបើកហាងរបស់លោកផ្ទាល់ ដោយមានការជួយជ្រោមជ្រែងពីថៅកែក្រណាត់ គឺលោក Marcel Boussac ។ លោកបានចេញម៉ូតដំបូងរបស់លោកប្រកបដោយជោគជ័យ ដែលមានឈ្មោះថា New Look ហើយទទួលបានការគាំទ្រពេញទំហឹងពីប្រធានទស្សនាវដ្តីម៉ូត Harper’s Bazaar។
ពេញមួយជីវិតរបស់ Christian Ernest Dior គឺទទួលបានការឈ្នះពានរង្វាន់ជាច្រើនសម្រាប់ការរចនាសម្លៀកបំពាក់ល្អបំផុត។
លោក Christian Ernest Dior ទទួលមរណភាពដោយមូលហេតុ គាំងបេះដូងភ្លាមៗ នៅពេលកំពុងធ្វើដំណើរកំសាន្តវិសម្សកាលក្នុង ទីក្រុង Montecatini ប្រទេសអ៊ីតាលី នៅថ្ងៃទី 24 ខែតុលា ឆ្នាំ 1957 – ពេលរសៀល ខណៈកំពុងលេងបៀរ។
