អ្នកសារព័ត៌មានជាង ៥០ស្ថាប័ន ចូលរួមវគ្គបណ្តុះបណ្តាល ជំនាញសរសេរព័ត៌មានសេដ្ឋកិច្ច ដោយមានការគាំទ្រពីរដ្ឋមន្ត្រីក្រសួងព័ត៌មាន

ក្រុមអ្នកសារព័ត៌មានប្រមាណ ១០០នាក់ ដែលមកពីជា ៥០ស្ថាប័ន បានចូលរួមវគ្គបណ្តុះបណ្តាល ជំនាញសរសេរព័ត៌មានសេដ្ឋកិច្ច និងចំណេះដឹងទាក់ទងនឹងពន្ធដារ ក្រោមអធិបតីភាពដ៏ខ្ពង់ខ្ពស់ ឯកឧត្តម នេត្រ ភក្រ្តា រដ្ឋមន្ត្រីក្រសួងព័ត៌មាន ដែលរៀបចំឡើងដោយសមាគមសហគ្រិនសារព័ត៌មាន សេដ្ឋកិច្ចកម្ពុជា (CEMEA )និងសមាគមសហព័ន្ឋសេវាកម្មពន្ឋដាកម្ពុជា (CTAFA) នៅទីស្តីការក្រសួង នាព្រឹកថ្ងៃទី១៥ សីហា ឆ្នាំ២០២៤។

ក្នុងឪកាសនោះដែរ​ ឯកឧត្តម រដ្ឋមន្ត្រី បានបង្ហាញពីការគាំទ្រទៅដល់សមាគម CEMEA និង CTAFA ដែលបានបើកវគ្គបណ្តុះបណ្តាលនេះឡើង ក្នុងគោលបំណងចង់ផ្លាស់ប្តូរផ្នត់គំនិតរបស់អ្នកសារព័ត៌មានឱ្យងាកពីការសរសេរអត្ថបទព័ត៌មានបែបមិនសូវមានប្រយោជន៍ ទៅជាការសរសេរអត្ថបទព័ត៌មានបែបផ្តល់ចំណេះដឹងពាក់ព័ន្ធទៅនឹងដំណើរនៃការអភិវឌ្ឍរបស់ប្រទេសជាតិ ឬជាព័ត៌មានបែបសេដ្ឋកិច្ចវិញ ខណៈដែលកម្ពុជាកំពុងទទួលបាននូវកំណើនសេដ្ឋកិច្ចជាបន្តបន្តាប់ ក្រោមនយោបាយ ឈ្នះ ឈ្នះ ដែលបានដាក់ចេញដោយសម្តេចតេជោ អតីតនាយករដ្ឋមន្ត្រី។

ក្នុងនោះ ឯកឧត្តមរដ្ឋមន្ត្រី បានបន្ថែមថា ក្នុងបច្ចុប្បន្ននេះអ្នកសារព័ត៌មានគួរងាកមកសរសេរព័ត៌មាន ដែលមានប្រយោន៍ទៅសល់សង្គមជាតិ ដែលចង់ឱ្យមានការផ្លាស់ប្តូរចំពោះអ្នកសារព័ត៌មានពីការសរសេរព័ត៌មានដែលឥតប្រយោជន៍ទៅជាការសរសេរបែបមានប្រយោជន៍វិញ នោះគឺពាក់ព័ន្ធទៅនឹងដំណើរនៃការអភិវឌ្ឍរបស់ប្រទេសដែលក្នុងនោះរឿងសេដ្ឋកិច្ចជាការសំខាន់ ខណៈដែលកម្ពុជាកំពុងមានកំណើនសេដ្ឋកិច្ចដ៏រឹងមាំមួយ ដើម្បីធ្វើការផ្លាស់ប្តូរនូវផ្នត់គំនិតរបស់អ្នកអាន អ្នកស្តាប់ ដែលធ្លាប់តែចូលចិត្តចំពោះដំណឹងបែបសន្តិសុខសង្គម បែបជារឿងអាស្រូវរបស់បុគ្គលល្បីឈ្មោះឱ្យទៅជាការចង់អាន ចង់ស្តាប់នូវព័ត៌មាន ឬដំណឹងស្តីពីសេដ្ឋកិច្ចវិញ។

នៅក្នុងវគ្គបណ្តុះបណ្តាលនេះ ក៏មានការអញ្ចើញចូលរួមជាវាគ្មិន ពីលោក គី សុខលីម ឧត្តមទីប្រឹក្សាសមាគម CEMEA ដែលលោកបានបង្ហាញពីមូលដ្ឋានគ្រឹះសារព័ត៌មាន និងវិធីសាស្រ្តសរសេរព័ត៌មានសេដ្ឋកិច្ច ដោយលើកយកពីលក្ខណៈខុសគ្នារវាង ប្រធានបទ មុម និងអត្ថបទ ។ លោកបានបន្ថែមថា យើងត្រូវជ្រើសរើស មុមណាមួយ មកសរសេរដើម្បីអោយមានភាពទាក់ទាញ និងទទួលបានប្រសិទ្ថភាពខ្ពស់ ក៏ដូចជាទាញនូវចំណាប់អារម្មណ៍របស់អ្នកតាមដាន អោយងាកមកមើល និងគាំទ្រអត្ថបទព័ត៌មានបែបសេដ្ឋកិច្ចនេះ។

ចំពោះ លោកយិន លាងគង់ ប្រធានសមាគមសហគ្រិនសារព័ត៌មានសេដ្ឋកិច្ចកម្ពុជា (CEMEA) ដែលលោកបានយកចិត្តទុកដាក់ និងខិតខំរៀបចំវគ្គបណ្តុះបណ្តាលនេះឡើងគឺក្នុងគោលបំណងរួមចំណែកជាមួ យរាជរដ្ឋាភិបាលកម្ពុជា ដើម្បីផ្សព្វផ្សាយព័ត៌មានសេដ្ឋកិច្ចជាតិ ទៅកាន់មជ្ឈដ្ឋានជាតិ អន្តរជាតិឲ្យបានទូលំទូលាយ ស្របតាមគោលនយោបាយ របស់រាជរដ្ឋាភិបាលកម្ពុជា ក្រោមការដឹកនាំរបស់សម្តេចមហាបវរធិបតីហ៊ុន ម៉ាណែតនាយករដ្ឋមន្រ្តីនៃកម្ពុជា។ ដោយលោកបានបន្ថែមថា សមាគមចង់ផ្សព្វផ្សាយ ពីការអភិវឌ្ឍរបស់រាជរដ្ឋាភិបាល ពីព័ត៌មានសេដ្ឋកិច្ច ពីព័ត៌មានមានលក្ខណៈអប់រំ និងស្ថាបនាដល់សង្គមជាតិ ដើម្បីកាត់បន្ថយព័ត៌មានកន្លែងក្លាយ និងព័ត៌មានមិនផ្តល់តម្លៃដល់សង្គម ។

រួមជាមួយគ្នានេះ ឯកឧត្តម អ៊ុំ សារ៉ាវុធ ប្រធានសមាគមសហព័ន្ធភ្នាក់ងារសេវាកម្មពន្ធដារកម្ពុជា បានធ្វើបទបង្ហាញអំពី កាតព្វកិច្ចសារពើពន្ធសម្រាប់ម្ចាស់អាជីវកម្មគួរកត់សម្គាល់ ដែលទាក់ទងទៅនឹងការចុះបញ្ញីសហគ្រាស ដោយឯកឧត្តមបានបង្ហាញលំអិតទាក់ទងទៅនឹងដំណើរការចុះបញ្ជីសហគ្រាស នៅក្រសួងពាណិជ្ជកម្ម អគ្គនាយដ្ឋានពន្ធដា និង ក្រសួងការងារ និងបង្ហាញពីចំណាត់ថ្នាក់ជាប់ពន្ធ ធំ ធម្យម និងពន្ធតូច ។ លោកបន្តថា “ពន្ឋដាមានសារៈសំខាន់ សម្រាប់សេដ្ឋកិច្ច និងអ្នកចង់បើកក្រុមហ៊ុន គួរតែស្វែងយល់ឲ្យបានច្បាស់លាស់ពីកាតព្វកិច្ចផ្នែកពន្ឋ ដើម្បីបញ្ចៀសបាននូវការផាកពិន័យ និងមិនបានបង់ពន្ឋត្រឹមត្រូវ ព្រោះការមិនបានបំពេញកាតព្វកិច្ចពន្ឋដា អាចមានទោសព្រហ្មទ័ណ្ឌ”។

អ្វីដែលពិសេសទៀតនោះ ក៏មានការអញ្ចើញចូលរួមជាវាគ្មិនពី តំណាងសមាគមធនាគារ និង តំណាងសមាគមមីក្រូហិរញ្ញវត្ថុ ក្នុងការធ្វើបទបង្ហាញអំពី ទិដ្ឋភាពទូទៅនៃវិស័យធនាគារ ហិរញ្ញវត្ថុ និងយន្តការគាំពាអតិថិជនរបស់សមាគមធនាគារនៅកម្ពុជា និង បង្ហាញពី ហិរញ្ញវត្ថុ បំណុល និងទិដ្ឋភាពទូទៅក្នុងវិស័យហិរញ្ញវត្ថុ ដែលធ្វើអោយអ្នកចូលរួមទទួលបានចំណេះដឹងជាច្រើនគួរអោយគាត់សំគាល់។

សូមជម្រាបជូនថា សមាគមសហគ្រិនសារព័ត៌មាន សេដ្ឋកិច្ចកម្ពុជា (CEMEA) ត្រូវបានក្រសួងមហាផ្ទៃចុះឈ្មោះជាផ្លូវការនៅក្រសួងមហាផ្ទៃ កាលពីថ្ងៃពុធ ទី១៣ ខែមីនា ឆ្នាំ២០២៤ ដោយផ្តោតលើព័ត៌មានសេដ្ឋកិច្ច ដើម្បីជម្រុញ និងបង្កើនការផ្សព្វផ្សាយគ្រប់ទិដ្ឋភាពសេដ្ឋកិច្ច ហិរញ្ញវត្ថុ ការអភិវឌ្ឍន៍ អចលនទ្រព្យទៅកាន់មជ្ឈដ្ឋានជាតិ អន្តរជាតិឲ្យបានដឹងពីកាលានុវត្តន៍ភាពពិតនៅកម្ពុជា។ ក្នុងនោះ CEMEA ចង់រួមចំណែកជាមួយរាជរដ្ឋាភិបាល ដើម្បីរុញច្រានប្រទេសនេះឲ្យឈានឆ្ពោះ ទៅកាន់ឋានៈជាប្រទេសមានប្រាក់ចំណូលមធ្យមកម្រិតខ្ពស់នៅឆ្នាំ២០៣០ និងប្រទេសមានប្រាក់ចំណូលខ្ពស់នៅឆ្នាំ២០៥០ ខាងមុខ។