ធនាគារជាតិនៃកម្ពុជា ចាប់ដៃគូជាមួយ Travelex ដើម្បីធ្វើពាណិជ្ជកម្មប្រាក់រៀល

ក្រុមហ៊ុន Travelex ដែលជាប្រតិបត្តិករប្តូររូបិយប័ណ្ណបរទេសឈានមុខគេមួយ ក្នុងពិភពលោក បានចាប់ដៃគូជាមួយធនាគារជាតិនៃកម្ពុជា ដើម្បីដាក់បញ្ចូលប្រាក់រៀលនៅក្នុងតារាងជួញដូររូបិយប័ណ្ណនៅបញ្ជរប្តូរប្រាក់របស់ក្រុមហ៊ុន Travelex សម្រាប់ការប្តូរប្រាក់ជាមួយរូបិយប័ណ្ណបរទេស នៅព្រលានយន្តហោះអន្តរជាតិ Haneda ទីក្រុងតូក្យូ ប្រទេសជប៉ុន នាថ្ងៃទី១៦ ខែមេសា ឆ្នាំ២០២៤ ។

យោងតាម ធនាគារជាតិនៃកម្ពុជា ការចុះបញ្ជីប្រាក់រៀលនៅទីក្រុងតូក្យូជាលើកទីមួយបានធ្វើឱ្យមានរូបិយប័ណ្ណសម្រាប់ភ្ញៀវទេសចរជប៉ុនដែលមកទស្សនាប្រទេសកម្ពុជា ដែលជួយសម្រួលដល់លំហូរទេសចរណ៍ទៅកាន់ប្រទេសកាន់តែច្រើន។

សំខាន់ជាងនេះទៅទៀត វាបានគូសបញ្ជាក់ការចុះបញ្ជីប្រាក់រៀលនៅក្នុងមជ្ឈមណ្ឌលហិរញ្ញវត្ថុអន្តរជាតិ ដូចជាទីក្រុងតូក្យូ បង្ហាញពីការបំប្លែងជាអន្តរជាតិនៃប្រាក់រៀល ដែលឆ្លុះបញ្ចាំងពីការកើនឡើងនូវទំនុកចិត្ត និងការទទួលយកប្រាក់រៀលជាអន្តរជាតិ ដែលជាលទ្ធផលនៃស្ថិរភាពអត្រាប្តូរប្រាក់ជាងពីរទសវត្សរ៍។

គួរបញ្ជាក់ថា នេះជាលើកទីពីរហើយ ដែលក្រុមហ៊ុន Travelex បានសហការជាមួយធនាគារជាតិនៃកម្ពុជា ក្នុងការដាក់បញ្ចូលប្រាក់រៀលនៅលើតារាងជួញដូរនៅមជ្ឈមណ្ឌលហិរញ្ញវត្ថុអន្តរជាតិ បន្ទាប់ពីបានដាក់បញ្ចូលនៅព្រលានយន្តហោះអន្តរជាតិ Changi ប្រទេសសិង្ហបុរី កាលពីឆ្នាំ២០២៣។ នៅពេលខាងមុខ ធនាគារជាតិនៃកម្ពុជានឹងបន្តសហការជាមួយក្រុមហ៊ុន Travelex ដើម្បីដាក់ប្រាក់រៀលនៅលើតារាងជួញដូរនៅមជ្ឈមណ្ឌលហិរញ្ញវត្ថុអន្តរជាតិជាច្រើនទៀតនៅលើពិភពលោក។