Pacquiao ព្រមព្រៀងទទួលការប្រកួតជាមួយកីឡាករជើងខ្លាំងវ័យក្មេងរបស់ជប៉ុន

 

Manny Pacquiao នឹងត្រូវប្រកួតជាមួយ Chihiro Suzuki ប្រភេទទំងន់​​ 150ផោន​​ ជាអ្នកប្រដាល់ក្បាច់គុនចម្រុះ MMA របស់ជប៉ុន និងជាម្ចាស់ជើងឯកប្រដាល់សេរី​ ខ្សែក្រវាត់សង្វៀន RIZIN នៅក្នុងការប្រកួតតាំងពិពណ៌មួយនៅថ្ងៃទី 28 ខែវិច្ឆិកា ឆ្នាំ 2024ខាងមុខនេះ។

យោងតាមព័ត៌មានបញ្ជាក់ថា ការប្រកួតក្នុងព្រឹត្តិការណ៍ Super Rizin 3​ ប្រកួតចំនួន ៣ទឹក និង ១ទឹកមានរយៈពេល ៣នាទី ដែលគ្រោងនឹងធ្វើឡើងនៅសង្វៀន Super Saitama ក្នុងប្រទេសជប៉ុន​ ហើយការ​ប្រកួត​នេះ​នឹង​ធ្វើ​តាម​ច្បាប់​ដ៏​ពិសេស​របស់ Rizin ។

ដោយការ​ប្រកួត​នេះ​នឹង​បង្ហាញ​ពី​ការ​វិល​មក​កាន់​សង្វៀន​មួយ​ទៀត​សម្រាប់ Manny Pacquiao ដែល​បាន​ចូល​និវត្តន៍​ពី​ប្រដាល់​អាជីព​សកលរបស់គាត់ ក្រោយចាញ់ Yordenis Ugas ក្នុងឆ្នាំ ២០២១

ប៉ុន្តែនៅក្នុងឆ្នាំ២០២២គាត់ក៏បានបង្ហាញមុខនៅលើសង្វៀនម្តងទៀត ដោយប្រកួតឈ្នះ YouTuber ជនជាតិកូរ៉េខាងត្បូង DK Yoo ដោយពិន្ទុឯកចន្ទៈ ក្នុងការប្រកួតលក្ខណៈពិពរព័ណ រយៈពេលប្រកួត ៦ទឹក។

Chihiro Suzuki ដែលជាម្ចាស់ខ្សែក្រវាត់ Featherweight របស់ Rizin បានបង្ហាញនូវទំនុកចិត្តក្នុងការផ្តួល Pacquiao ឱ្យសន្លប់នៅទឹកទី 1 ខណៈដែល Pacquiao ថាប្រដាល់សកលមានការប្រកួតប្រជែងនឹងខ្លាំងជាង MMA ។

គួរបញ្ជាក់ដែរថាគិតត្រឹមពេលនេះ Manny Pacquiao គាត់មានវ័យ ៤៥ឆ្នាំ ចំណែក Chihiro Suzuki មានអាយុត្រឹមតែ ២៥ឆ្នាំប៉ុណ្ណោះ​ ហើយ៩ប្រកួតចុងក្រោយ របស់អ្នកប្រដាល់សេរីនិងគុនចម្រុះរូបនេះមិនទាន់ស្គាល់ពាក្យថា ចាញ់នៅឡើយទេ ៕