កុយ អេណា ចេញមុខជួយផ្សព្វផ្សាយទេសចរណ៍ពីរាជធានីភ្នំពេញ ទទួលបានការសាទរច្រើន

អតីតលំដាប់រងទី១ Miss Grand Cambodia 2023 កញ្ញា កុយ អេណា នៅម្សិលមិញនេះបានទទួលការចាប់អារម្មណ៍ខ្លាំងក្រោយពីចេញសកម្មភាពផ្សព្វផ្សាយទេសចរណ៍របស់ព្រះរាជាណាចក្រកម្ពុជា ដោយផ្ដើមពីរាជធានីបេះដូងរបស់ប្រទេស។

នេះជាសកម្មភាពថ្មីទៀតអំពីការផ្សព្វផ្សាយទេសចរណ៍របស់កម្ពុជារបស់ អេនណា ទន្ទឹមនឹងថ្មីៗនេះ គេសង្កេតឃើញថា នាងមានការចូលរួមក្នុងការលើកកម្ពស់ឧស្សាហកម្មគ្មានផ្សែងរបស់កម្ពុជាច្រើន។

នៅរសៀលម្សិលមិញ កុយ អេណា បានចូលរួមដោយផ្ទាល់ក្នុងការលើកកម្ពស់ទេសចរណ៍របស់ប្រទេស ដោយនាងបញ្ចេញស៊េរីរូបភាពសិល្បៈមួយ ដែលនាងថតនៅតំបន់កោះនរាហ៍ ដែលជាសមិទ្ធផលរបស់ជាតិថ្មីសន្លាងកណ្ដាលរាជធានី។ អេណា លើកឡើងថា ទីតាំងនេះ បានកំពុងក្លាយជា Landmark (ទីកន្លែងសម្គាល់) ប្រចាំតំបន់អភិវឌ្ឍកោះនរា និងតំបន់អភិវឌ្ឍកោះពេជ្រ ដែលបង្អួតនូវសម្រស់ដ៏ស្រស់ឆើតឆាយនៃរាជធានីភ្នំពេញ បង្ហាញពីហេដ្ឋារចនាសម្ព័ន្ធទំនើបស៊ីវិល័យ ដូចបណ្តាប្រទេសអភិវឌ្ឃដទៃទៀតដែរ។

យុវតីវ័យ ២៣ឆ្នាំ បន្តទៀតថា “អេណា សូមស្វាមគន៍ភ្ញៀវទេសចរជាតិ និងអន្តរជាតិ មកលេងកំសាន្តនៅឯទីក្រុងភ្នំពេញ ដែលជាបេះដូងនៃព្រះរាជាណាចក្រកម្ពុជា ដោយក្តីរីករាយ!!”។ សកម្មភាពរបស់យុវតីកម្ពស់ ១,៧៣ម៉ែត្រ រូបនេះ ទទួលបានការសាទរយ៉ាងច្រើនពីប្រិយមិត្តលើបណ្ដាញសង្គម ដែលពួកគេយល់ថាជាសកម្មភាពគំរូក្នុងនាមជាសិល្បករម្នាក់។

តបទៅនឹងការគាំទ្រទាំងនេះ អេណា លើកឡើងទៀតថា អ្វីដែលនាងធ្វើ គ្រាន់តែចង់បំផុសនូវអ្វីដែលល្អៗនិងស្រស់ស្អាតដើម្បីទាក់ទាញភ្ញៀវទេសចរណ៍ជាតិនិងអន្តរជាតិឲ្យបានដឹង នឹងបានស្គាល់ និងដឹងពីកម្ពុជាថាពេលនេះ បានរីកចម្រើនដល់កម្រិតណា។

ដូចបញ្ជាក់ពីខាងលើ នេះមិនមែនជាសកម្មភាពលើកទី១របស់ អេណា នោះទេ ក្នុងបុព្វហេតុលើកស្ទួយទេសចរណ៍ក្នុងស្រុក ខណៈនាងបានចូលរួមជាហូរហែរួចមកហើយ។ ជាក់ស្ដែង គេឃើញយុវតី បានធ្វើការស៊ែរព័ត៌មានបន្តបន្ទាប់អំពីការលើកកម្ពស់ទេសចរណ៍កម្ពុជា ក្នុងនោះមានព្រឹត្តិការណ៍សម្ដែងក្បាច់គុនល្បុក្កតោ និងសង្ឃសៅលិញនៅមុខប្រាសាទបាយ័នខេត្តសៀមរាប។

បន្តមកទៀត នាងបានការលើកទឹកចិត្តឲ្យ Influencer ល្បីៗកម្ពុជាបំផុតចលនា Apsara Make Up Trend ខណៈពេលនេះ ពិភពលោកបាន និងកំពុងពេញនិយមចំពោះចលនា Ashoka Make Up Trend របស់ឥណ្ឌា។ នាងថា បើធ្វើបាន Apsara Make Up Trend នឹងធ្វើឲ្យចំណេញដល់ទេសចរណ៍ជាតិយើងយ៉ាងច្រើន។

សកម្មភាពរបស់ កុយ អេណា ទន្ទឹមគ្នានឹង ក្រសួងទេសចរណ៍បាន និងកំពុងបើកយុទ្ធនាការ «ទស្សនាសៀមរាប ឆ្នាំ២០២៤» ក៏ដូចជាអបអរសាទរ «ឆ្នាំនៃការផ្លាស់ប្តូរប្រជាជន និងប្រជាជន កម្ពុជា-ចិន ២០២៤»ផង។ យុទ្ធនាការនេះ ក្រសួងទេសចរណ៍នៃព្រះរាជាណាចក្រកម្ពុជា និងរដ្ឋបាលប្រជាជនខេត្តហឺណាន និងរដ្ឋបាលខេត្តសៀមរាប បានសហការរៀបចំព្រឹត្តិការណ៍ពិព័រណ៍វប្បធម៌ទេសចរណ៍ និងការសម្ដែងក្បាច់គុនសាវលីញ និងគុនល្បុក្កតោនៅអង្គរ (When Shaolin Meets Bokator At Angkor) ដ៏អស្ចារ្យ នៅបរិវេណខាងជើងប្រាសាទបាយ័ន នាព្រឹកថ្ងៃទី២៤ ខែមេសា ឆ្នាំ២០២៤។

ព្រឹត្តិការណ៍នេះ គឺជាការសម្តែងរួមគ្នារវាងក្បាច់គុនសៅលីញ និងក្បាច់គុនល្បុកត្តោរបស់ខ្មែរ ក្នុងគោលបំណងចម្បង គឺផ្សព្វផ្សាយគោលដៅទេសចរណ៍ និងវប្បធម៌រួមគ្នា ដើម្បីទាក់ទាញអ្នកទេសចរមកកាន់កម្ពុជាកាន់តែច្រើន ដោយស្វែងយល់អំពីសក្តានុពលទេសចរណ៍ វប្បធម៌ អរិយធម៌ និងទំនៀមទម្លាប់ប្រជាជនកម្ពុជា៕