ខ្មែរ
English
មិនមែនគ្រប់អ្នកកើតជំងឺមហារីកសុទ្ធតែសល់ជីវិតនោះទេ ប៉ុន្តែអ្នកនាង អេង វ៉ាណង គឺជាអ្នកជំងឺម្នាក់ ដែលអាចដណ្ដើមជីវិតពីយមរាជបាន។ ដូច្នេះហើយ អ្នកនាងរីករាយក្នុងការចែករំលែកចំណេះដឹងអំពីជំងឺនេះដល់ស្ត្រីគ្រប់រូប។
នៅសប្ដាហ៍មុន វ៉ាណង បានបង្ហាញខ្លួនគួរឲ្យភ្ញាក់ផ្អើលក្នុងសភាពធម្មតានៅក្នុងកម្មវិធីបោះឆ្នោតជ្រើសរើសប្រធានសមាគមសិល្បករខ្មែរអាណត្តិទី៦។ ការភ្ញាក់ផ្អើល ព្រោះកន្លងមកគេដឹងថា តារាសម្ដែងរូបនេះ បានជួបការយាយីអាយុជីវិត ដោយជំងឺមហារីកសុដន់យ៉ាងធ្ងន់ធ្ងរ ធ្វើអោយជ្រុះសក់អស់ រាងកាយស្គមស្លេកស្លាំង មើលពុំចង់ស្គាល់។ ប៉ុន្តែបង្ហាញខ្លួនជាសាធារណៈក្នុងកម្មវិធីសិល្បៈលើកដំបូង វ៉ាណង ត្រឡប់មកសភាពស្រស់ស្អាតដូចដើម១០០%។
បញ្ហាក្នុងបទសម្ភាសន៍ជាមួយ ឡេឌីស៍ អ្នកនាង អេង វ៉ាណង បានប្រាប់ថា អ្នកនាងបានជាសះស្បើយពីជំងឺដ៏សាហាវនេះច្រើនខែហើយ ក្រោយពីបានទទួលការព្យាបាលអស់រយៈពេលប្រមាណ១ឆ្នាំ ដោយបានចំណាយធនធានអស់ពីខ្លួន។ វ៉ាណង ថា វាជារឿងនឹកស្មានមិនដល់ដែលអាចដណ្ដើមជីវិតពីយមរាជមកបាន។ វ៉ាណង ថ្លែងថា៖ “ “និយាយទៅ ខ្ញុំពិតជាអត់នឹកស្មានទេថា អាចមានជីវិតបានមកឈរនៅទីនេះទេបង គឺអត់នឹកស្មានហ្មង!”។
អេង វ៉ាណង កើតជំងឺមហារីកសុដន់តំណាក់កាលទី៣។ ដំបូងឡើយ សភាពជំងឺបានផ្ដើមជាមួយដុំសាច់តូចៗលើសុដន់។ ក្រោយមកមានសភាពហើម ក្រោយពេលទៅពេទ្យពិនិត្យ លទ្ធផលមកថា វាជាដុំសាច់កាច ដែលភ្លាមៗធ្វើឲ្យអ្នកនាងស្លុតចិត្តយ៉ាងខ្លាំង។ អ្នកម្ដាយកូន ៣នាក់ ថ្លែងថា “ដំបូងឡើយខ្ញុំបាក់ទឹកចិត្តយ៉ាងខ្លាំង ព្រោះតូចចិត្តថា មនុស្សរាប់ពាន់ រាប់ម៉ឺននាក់ហេតុអី វាមកកើតលើយើងអីចឹង…ខ្ញុំពិបាកចិត្ត បាក់ទឹកចិត្តយ៉ាងខ្លាំង”។
ប៉ុន្តែក្រោយមក បានការលើកទឹកចិត្តពីមនុស្សជុំវិញខ្លួន និងការតាំងចិត្តខ្លួនឯងថា ត្រូវតែរស់ដើម្បីកូនទាំង៣ បូកផ្សំនឹងការព្យាបាលមានទាំងការលេបថ្នាំ បាញ់កាំរស្មី និងចាក់សារធាតុគីមីផង ទីបំផុត វ៉ាណង ក៏អាចដណ្ដើមជីវិតពីយមរាជមកបាន។
ឆ្លងកាត់បទពិសោធន៍ផ្ទាល់ខ្លួន អេង វ៉ាណង បានចែករំលែកថា ទន្ទឹមនឹងការព្យាបាលតាមក្បួនវេជ្ជសាស្ត្រ គន្លឹះចម្បងមួយដែលជួយអ្នកនាងយកឈ្នះជំងឺនេះបាន គឺធ្វើចិត្តឲ្យរឹងមាំ កុំបាក់ទឹកចិត្តនៅចំពោះមុខវា។ តារាស្រីរូបនេះ បច្ចុប្បន្នជាស្ត្រីមេម៉ាយ ដែលត្រូវមើលថែកូន ចំនួន ៣នាក់។ ចំណុចនេះ ដែលធ្វើឲ្យអ្នកនាងរឹងមាំថា ត្រូវតែរស់ដើម្បីមើលថែកូនទាំង៣បន្តទៀត។
ចុងក្រោយ វ៉ាណង ផ្ដាំផ្ញើស្ត្រីគ្រប់រូប ឧស្សាហ៍ឆែកមើលសុខភា ហើយប្រញាប់ទទួលយកការព្យាបាលប្រសិនបើមានអ្វីគួរឲ្យសង្ស័យ។ បន្ថែមពីលើនេះ ប្រសិនបើបងប្អូនស្រី្ត ចង់បានបទពិសោធន៍យកឈ្នះ ឬការប្រឹក្សាបន្ថែមអំពីជំងឺនេះ អ្នកនាងស្វាគមន៍ដោយក្ដីរីករាយ៕
សិក្សាបន្ថែមពីសភាពជំងឺមហារីកសុដន់តាមក្បួនវេជ្ជសាស្ត្រ សូមចុចលើទីនេះ
